有粉絲問，Prof J寫股，有時講冧巴，有時又唔講冧巴，邊句講真邊句講假。
其實，最主要嘅分別係有啲冧巴，炒味較濃（因為全部都睇緊資金盤同邊個芬佬買同賣），一星期寫一次，驚大家走唔切，劈我咪仲大鑊。
所以，有睇我嘅文，之前細細段點題嘅中國光纖（3777），已由推介2.2元去到2.9元左右，回報32%，全因喺2.28元有一個「好大好大好大」嘅支持價量頂住。所以喺度寫，放一個中長線目標的確係唔錯。
豪特小注等發圍
再之前介紹過嘅豪特（6880），喺買賣嘅冷淡與熱情之間，一級又一級向上，跟咗嘅粉絲都應該有唔錯嘅回報。
豪特下一步走勢係點，兩年過後，豪特殼價有市，不斷有買家越洋同佢哋嘅大佬親善一番，以1.2元做支持，小注睇吓佢點發圍。
第三支穿雲箭，Prof J預備做聖鬥士星矢，穿起件人馬座聖衣，準備用箭射住隻先達物流（6123），半新股，物流概念（即係有機會變身玩電貿啦），炒高回調一半成交小，喺1.5元附近企得定一定之後又慢慢上。
作為呢個板塊嘅領導者，1995年開波，廿幾年嘅經驗，加上管理團隊嘅業務展望又非常之有信心，2011至2013年嘅毛利低，因用水收購荷蘭業務同發展美國市場，而家開始略有收成。
最緊要係好似我先前咁講，潛在電貿概念加上又快到中期，確係可以準備射住。1.8元穿咗回落，先喺1.75元擺個位入，破咗1.8元就要學孫柏文話齋，不問價追查（佢老哥俾我抽水但唔會詐我型，）繼續追蹤，出發！
另外，Prof J喺新城資訊台逢星期六7︰00pm嘅全新節目——郎才女貌正式登場，唔講冧巴，講男女大翻身，大提升，更加有好多真人show會陸續登場，向明星化進發，記得支持吓！
徐燦傑
齊魯國際控股首席策略總監
本欄逢周四刊出