肥仔K趁得閒，星期一到中環搵牙醫洗牙，牙醫話佢幾年不見人，牙齒污糟，於是洗牙之餘，向佢教訓牙齒衛生一番。洗牙之後，肥仔K搵到上門，於是帶佢去食日本料理。擺花街尾荷李活道交界有一間Sushi Sase，記得一個月來自己去過兩次，兩次都在下午一時後，自己坐喺裏面，每次見到食客不及半打，於是以為呢間餐廳生意清淡，唔駛訂位，是日一時二十分與肥仔K行入去，誰知係全場滿座格，當堂為之愕然，侍應話：「冇位呀先生。」一睇就知啦，去邊度好呢，醒起「蘋果」曾經介紹PMQ（元創方）有一間新開西班牙餐廳，於是再向前行，好快就走到梁振英幾十年前嘅居所──荷李活道警察宿舍，經「保育」翻新後，叫做PMQ（即是Police Married Quarters）。
初次到PMQ，覺得指示牌缺乏，搵地方唔容易，內裏遊人甚少，在此開舖頭，租金雖便宜，恐怕要捱番一段時候，只能寄望周末有好生意。卒之搵到間西班牙餐廳，接待員話七樓係Fine Dinning，有衣着規矩，肥仔K着條三個骨短褲，不能入內。在此開餐廳竟然擺足五星酒店款頭，自視甚高喎，想來係藝高人膽大之故。PMQ後面就係史丹頓街，食肆林立，競爭不少㗎。上唔到七樓西班牙餐廳，唯有在六樓（地中海式）餐廳進食，價錢一啲都唔便宜，但算係全場滿座，顯見有啲聲勢。肥仔K上網查吓資料，哦，原來兩位創辦人之中，一位係巴塞隆拿二星名廚，唔怪得有把炮。我地食落，覺得西班牙豬肉好唔錯，但在大熱天時由中環行路上嚟，肯定全身汗濕，穿得整齊嚟食西班牙靚餐嘅話，最好坐的士，塞一塞車先。
西班牙地中海式，即是上菜悠閒，比較慢，一餐午飯，食到三點零，等上菜之時，睇吓手機和訊財經App，睇吓內地有冇過癮新聞先。有一段講及內地大賓架張紅力（工商銀行副行長）嘅薪水高過工行董事長，為何如此，孰真孰假，大家只能猜測。點解和訊對張紅力有咁詳細報導呢，主因就係佢未到工行之前，係德意志銀行亞太區投資銀行最高負責人/中國區董事長，2010年離開，加盟工行，但德意志銀行在2014年8月8日入稟香港法院，控告張紅力違反誠信，「虛假陳述行為」，與一間離岸公司Harperskille Ltd串謀，向佢索償390萬美元加利息232萬美元。張紅力離職四年先至被德銀控告索償，官司他日開審，可能有內幕聽咯！