視帝黎耀祥同蘇玉華呢對好拍檔，噚日本來齊齊出席3家居寬頻同樂視喺黃埔舉行記者會，點知前晚大會臨時Fax去各大報館，話佢哋兩個因為有特別拍攝嘅關係，所以臨時改咗周秀娜出席。有傳話大台唔想佢哋出席，唔知係咪因為大台一直同優酷土豆網合作，話晒樂視係業務對手，所以冇理由幫對家宣傳。
馮仁昭噚日搵咗蘇玉華了解呢件事，佢喺電話度話：「冇咁嘅事，本身係接咗，但係去唔到，係有節目突然間要去錄，我哋大前提梗係要做公司嘢為主。」
娜姐玉背有疤痕
執二攤出席嘅周秀娜，着咗一條黑色大露背裙出席，佢話：「噚晚臨時收到同事通知，出席今日呢個活動，因為同樂視有合作過，今次酬勞好好。」 睇嚟娜姐嘅地位已經同視帝睇齊？娜姐笑笑口話：「唔係，如果一個人可以頂到兩個人做嘅嘢都幾好。我唔介意俾人話執二攤，都係做嘢啫！」
娜姐個玉背有啲疤痕，佢話可能係之前拍戲吊威吔，搞到有少少傷。講到有冇諗過激光除疤？佢話：「嗰啲超高清嘅電視都會見到，所以有諗過。」喺活動完咗之後，有搵過大會負責人了解吓臨時換嘉賓呢件事，3嘅企業及市場傳訊總監何先生話：「本來係有搵過黎耀祥同蘇玉華，不過佢哋有特別通告，所以嚟唔到。」係咪同業務衝突有關？佢話唔關事！
撰文：馮仁昭
