環保板塊起動，華能新能源（958）衝高8%，國電科環（1296）炒高4%，今日推介半冷門股泛亞環保（556），大有機會打造成另一隻爆升股。
泛亞環保主要產銷環保產品及設備、承接環保建設工程、提供環保相關專業服務及製造還保建築材料，業務上中下游齊晒。講亮點，公司最新推出嘅環保物料「木絲水泥板」，成為未來增長引擎。根據管理層所講，今年第四季各省份會陸續確定建築材料標準，旗下木絲水泥板有望成為指定工程物料，泛亞環保作為獨家供應商，發過豬頭。
雖然相關業務僅屬起步階段，但公司月初發盈喜時，已講明因為木絲水泥板業務收益顯著增長，以及環保產品及設備銷售毛利率改善。四個字講晒︰真材實料！亦反映公司錢途一片光明。泛亞環保7月先舊後新配股集資6,500萬銀，連同手頭淨現金5.6億銀，即有逾6億銀在手，最新市值僅14億銀，含金量極高，也意味夠晒銀彈大展拳腳。
街貨少易挾上
現時大股東蔣泉龍家族持股71.5%，連同部份冇露手影嘅基金持股，街貨隨時只得一兩億股，以呢期咁墟冚嘅市況，一旦獲資金相中，肯定搶貨搶到甩轆。事實上，泛亞環保今年股價仍然微跌，相比起其扭虧為盈業績，落後得不太合理。係咁易炒番上廿億市值，可見2.38元，潛在升幅45%，屆時仍較年初高位2.79元低15%，趁下星期五放榜前買定有着數。
唐牛
https://www.facebook.com/tongcow88