所謂「猛虎不及地頭蟲」，就算股神畢菲特咁勁，嚟到亞洲區都要搵熟路人士指點迷津！《華爾街日報》引述消息人士指，巴郡旗下嘅專門保險業務，提供商業物業、傷亡同埋其他保險，正喺香港、悉尼、新加坡同埋歐洲申請牌照，而且密密手挖角。
其中，AIG前香港及台灣業務主管Marc Breuil，同埋AIG意外保險業務亞太區主管Marcus Portbury，已經應承加入畢菲特嘅投資旗艦，為股神進軍亞洲保險業做好準備。
消息人士又話，巴郡計劃除咗核心嘅再保業務外，亦會進軍亞洲地區嘅商業保險。其實唔止巴郡，全世界嘅保險商都對亞洲新興市場磨拳擦掌，例如AIG前行政總裁Maurice Greenberg帶領嘅Starr Group，今年初就已經收購內地大眾保險。