澳門今年嘅光輝五月，以破紀錄嘅遊行人數推翻特首同高官自肥法案，香港人都覺得好神奇。發動反離補法案嘅澳門良心成員蘇嘉豪話，其實成件事係冰封三尺，非突然爆發。嘉豪仔就出咗本新書《六三○的日與夜》，回顧一個啟蒙澳門新一代社運嘅事件。
分享社運心路歷程
上年6月30日，一班澳門年輕人，因為不滿行政法務司司長陳麗敏涉嫌利用職權成功申請咗一幅永久墓地，安葬亡父，於是操上陳麗敏嘅官邸示威。佢哋同警方對峙咗成日，示威由白天延續到夜晚，最後嘉豪仔等四人被捕。倒陳運動失敗，但係事件喚醒社會關注高官貪腐問題，為今年嘅反離補法案遊行燃下火種。
嘉豪仔已經將呢場啟蒙運動寫成回憶錄，同關心澳門社運嘅人分享佢嘅心路。佢同八方講，喺澳門呢啲咁和諧愛國嘅社會，想話出本講真話嘅書都唔容易。首先，澳門最大書商《澳門日報》出版社睬你都有味，至於細嘅書商又驚得罪人又驚蝕本。最終佢都搵到有心人幫佢，但係大家想買，就要上網嘞（ http://goo.gl/mWvapx），因為暫時都未搵到有書店肯賣。