噚日睇到單新聞，喺十大吸引異性職業排行榜入面，睇「女揀男」頭四位得出一個結論，兩個字講晒：「膚淺」。頭三位順住數係iBanker、醫生、律師，你都可以硬兜話：「覺得佢哋型。」但第四位係高級公務員，低級都唔得。呢個職業除咗收入穩定外，真係都諗唔到有咩咁吸引？港女向錢看，商家佬更甚。近來好多老牌工業股都賣盤，好似升岡（485）、昌明（1196）。鬼咩，近十幾廿年，香港工業已經式微，內地企業競爭又大，香港好多廠商都做唔住。
睇番上述兩間廠業績，近幾年蝕錢蝕到趴喺度。你一係好似CEC國際（759）咁轉型搞零食生意，如果唔係，倒不如趁而家殼股渴市，賣走隻殼甩身後又一條好漢。菲菲覺得世界集團（713）呢隻老牌工業股，極具賣殼憧憬。首先公司主要做PVC管材，由2010年起，賺一年後又蝕一年，去年全年更蝕4,696萬元。近幾年經營困難，未來相信只會難上加難，咁已俾到理由公司去賣殼。第二係公司市值得2億幾，殼價都唔止啦！睇埋資產負債表，有成8,585萬cash，佔市值近一半。即係現時股價入面，有近一半都係現金，NAV有1.427元。有咁多資產喺手，炒呢隻股安全感大過搵消防員做男友。噚日隻股升8%，亦有成交跟進。現時市賬率得0.27倍，低得可憐，以0.5倍PB計，即係股價要升到0.7元。
Fifi
http://www.facebook.com/lovefrystock
本欄逢周二、四刊出