新地（016）大股東郭氏家族長子郭炳湘離巢一段時間，近日市傳佢打算另起爐灶，仲話揀緊適合嘅殼股籌組「帝國集團」，早年跟郭炳湘合作投得將軍澳住宅地皮嘅麗新發展（488）同埋其他麗新系股份隨即變成大熱殼股。
不過，麗新國際（191）副主席周福安噚日出席完股東大會被問到呢件事，佢就好冷漠咁答：「我冇咁嘅消息，我冇理到郭生呢方面嘅事，你哋應該問番佢。」
周福安身兼麗新系內四間公司嘅執行董事，佢話冇聽聞賣殼，搞到傳聞冷卻唔少，早兩日好有鑊氣嘅麗新發展，噚日股價都冇乜力再上，大市升逾200點，佢都只係升1.8%。
講番㷫烚烚嘅樓市，周福安就話，現時樓價企得幾穩，如果可以保持都幾理想，最緊要係市場能夠穩定發展咁話。即係講緊阿媽係女人之類喇。