自由行旅客嚟到，喺金紫荊前企定定自拍幾張相到此一遊咪好囉，周街便便大家都會包容，因乜事爬上維園女皇像度？仲喺油麻地天后廟屋頂上飛來飛去，好唔和平好暴力囉！
在A至Z名勝前翻騰
美國人Chris O'Neill月前暢遊香港，揀咗25個名勝，由A至Z咁排，A就係星光大道（Avenue of Stars），Z就係動植物公園（Zoological and Botanical Gardens），逐個地方留影，而佢留下嘅身影，都係翻騰、跳躍中嘅動作，連死氣沉沉嘅灣仔金紫荊都俾佢活化晒。咁X字頭嘅地方邊到搵？結果畀佢諗到生吞成樽香港名物XO醬。
身在荷蘭嘅Chris來自美國加州，佢自發咗一個Chris Across the World計劃，出晒位咁巡遊世界名勝。Chris同八方講，好想佢玩轉香港嘅短片可以喚起港人，對自己嘅城市感到自豪。為咗避開人群，佢要晨早6點出動拍片，足足拍咗成個月。最大挑戰就係經常被保安員喝止，但都有保安通融。原來佢來港期間去過旅發局啲旅客中心，職員仲畀過意見佢。想睇Chris腳下停不了嘅香港，可上 http://youtu.be/bSqUIt0zGeA。