今年初接棒做會德豐（020）主席嘅吳宗權（Douglas），大家最近關心，並唔係佢上位後有乜大計，而係佢嘅感情生活。事關上月底，吳公子被娛樂版影到佢同一名俏女郎喺中環甜蜜約會。噚日會德豐業績會，係Douglas喺有關報道出街後首次公開露面，華華以為有機會可以恭賀佢，點知業績會一完，Douglas卡片都唔換，影完相就立即快身閃入去佈景板後面離開。唔通係怕記者問起戀情會尷尬？
吳宗權今年3月首次以主席身份主持業績會，當時Douglas完咗答問環節，仲留低跟記者傾多兩句，然後再跟當日到場參觀嘅中學生傾偈，傾到唔願走。估唔到事隔幾個月，變化就咁大。其實Douglas如果唔願意講私人事嘅話，相信大家亦會尊重，唔使玩快閃嘅。