香港體壇又有驚喜，11歲嘅陳芊藍（Nicole，圖）放棄所有興趣班，每周練足6日，周日終於喺台北小巨蛋舉行嘅亞洲花滑公開錦標賽，歷史性為港奪得女單銀牌。
亞錦賽歷史性摘銀
前日先比賽完畢嘅Nicole 趁下周先開學，噚日已經去咗深圳練習，所以話成功非僥倖。3歲開始學溜冰嘅Nicole，4年前放棄其他興趣班，將全部時間放晒喺花滑；上年得第9名嘅Nicole，今年喺10至13歲組別發揮平均，最終以34.28分得亞軍，屆居得40.94分嘅南韓選手之後，季軍則由北韓選手以33.33分奪得。呢面銀牌仲係佢嘅首面國際獎牌㖭！
偶像係南韓花滑女神金妍兒嘅Nicole，每周練足6日，每次兩個鐘，逢親長假期仲會去深圳標準場訓練；雖然每月花費過萬蚊，但陳媽媽都話值得。至於香港另一女單代表馬曉晴，就喺青年組得第7名。