領匯（823）將天水圍天瑞街市翻新，噚日舉行開幕禮，除咗領匯行政總裁王國龍，大家樂（341）主席陳裕光竟然都山長水遠走入天水圍做嘉賓，原來呢個街市判咗畀一間叫做建華集團嘅街市管理商經營，陳裕光係畀面建華老闆凌偉業先至出席。
陳裕光透露，佢跟建華老闆凌偉業係識咗好多年嘅朋友，佢專登現身做主禮嘉賓，支持老友之外，順便參觀翻新過嘅街市，取下經。建華除咗管理街市，都有經營飲食生意兼做肉類批發，同聲同氣，唔怪得凌偉業同陳裕光做到老友。
講番天瑞街市，呢度好夠冷氣，行入去似係去咗759阿信屋，事關連賣魚嘅檔口都裝上八達通機，整埋會員卡儲分機儲分換禮物，不過做會員就先要畀十蚊雞入會費。街坊接唔接受就唔知，去街市買嘢最緊要平啫。