有「商品大王」之稱嘅羅傑斯名氣咁大，竟然加盟一間市值不足20億元嘅創業板公司首華財經（8123）做非執董，開出嘅條件亦好特別。
佢冇收取現金報酬，3年合約只收6,000萬份10年期嘅購股權。呢類購股權通常講明員工離職後就冇得行使，71歲嘅羅傑斯就特別要求，將來唔做非執董，依然屬兼職僱員，僱傭關係亦唔受健康狀況影響，即使羅傑斯身故，佢嘅個人代表仍可於10年期限內行使購股權。
首華財經主要提供股票、期貨服務，今年初又跟深圳市全景網絡、德勝鋼鐵合作成立深圳前海首華貴金屬交易中心。
首華執董李耀新透露，佢哋就係喺今年4月邀請羅傑斯出席呢個貴金屬交易中心嘅開幕禮，做演講嘉賓，大家因此認識，對方睇好中國金屬市場發展，傾傾吓就答應做公司非執董，兼前海首華高級顧問，遲吓主要喺呢方面畀意見咁話。