律師會聽日有場內部世紀大戰，就係喺特別會員大會上，表決包括罷免會長林新強在內嘅三個議案。倒林同保林兩大陣營，連日出動搜刮授權票，而授權票收集期噚日傍晚屆滿，暫時未知喺授權票數目方面，邊一個陣營佔優，但八方肯定撐林新強嘅人士，都知道佢形勢不妙，所以出盡辦法為佢箍票。
法律界最近就流傳，連金牙大狀清洪都有幫手，點幫法呢？原來呢位大狀攞住成叠授權票殺入法院，幾乎逢人就問：你係律師定大狀？當知道對方係律師後，即時畀張授權叫佢哋幫幫手，據聞唔少律師仔見到大狀，唔知係俾佢嘅霸氣定名氣「懾」親，乖乖向前輩送簽名。但亦有律師仔玩嘢話自己係大狀，避過「被保林」一劫。
八方打過畀清洪，身在外地嘅佢對幫手拉票直認不諱，仲話同林新強識咗幾十年，一直支持佢，覺得佢嘅白皮書言論冇乜嘢，毋須因此下台，覺得外界唔應該大驚小怪！