中華廠商會80周年誌慶，會喺18號起逢一至五晚喺亞視推出訪談節目《廠出新里程》，由一班華商講吓奮鬥史，廠商會第一副會長陳淑玲話80年前，廠商會得11個會員咋，至今已有3,000個企業會員。一班亞視藝員噚日都有出席廠商會記者會「賀壽」，仲向廠商會贈送壽包、風車、賀匾同畫做禮。亞視自己台慶，都係大拋壽包慶生，廠商會獲贈壽包真係與有榮焉！
廠商會年底換屆，據聞兩位會長大熱陳淑玲同第二副會長李秀恒都私下約晤會董密斟拉票，但兩人被問到換屆事宜都不願多談，唔通怕選情曝光？八方聽聞廠商會可能喺換屆前9月訪京，有機會獲領導人接見。