百仕達（1168）大股東歐亞平喺今年5月增持咗2,844萬股，自2007年以嚟，集團首次坐擁近39億元淨現金，惹街外人垂涎。
百仕達上年尾揸現金41.6億元，借款2.8億元，淨現金高達39億元，或每股1.09元，百仕達現價（0.71元）潛喺七年底，每股淨現金講緊係現價1.6倍。又百仕達NAV2.13元，即係話，以每股0.71元買百仕達，除咗等於揸住每股1.09元淨現金外，其餘每股1.04元其他資產，係免本嘅。
現金足夠搞大龍鳳
百仕達大股東歐亞平今年5月三次出手增持集團，總共2,844萬股，每股入市成本價0.62元，百仕達現價唔係高出歐亞平入市價好多。
呢次歐亞平增持，講緊係，呢七年嚟頭一次，百仕達超級現金牛，PB（0.33倍）又低，何止歐亞平有興趣，搞到街外人都留意，有幾出奇呢？
場內和記港陸（715）噚日一枝箭升35%，集團俾深圳大孖沙泛海𥄫中買盤，家陣PB炒到上1倍樓上，睇到內地企業繼續求殼若渴，出價唔手軟。如果百仕達嘅管理層冇心搞嘢，大派現金股息後，再賣殼離場，相信好多人會有興趣。
又百仕達上年全年，嚟自利息收入嘅1億元，回報率得2.4厘，相信唔會只係靠低息收入度日，始終會有大搞作。
好似上次講咁，就算百仕達額外借多39億元番嚟，淨借款都係零，但集團手頭淨現金已經上到70億元，足夠搞一次大龍鳳。
輕手買百仕達，當佢升番上每股淨現金1.1元，現價要翻半番，又以近兩年內房殼股做參考，股價一升，就直指NAV水位，百仕達上番NAV兩蚊，兩倍潛在升幅。
錢雋
細價股專家
本欄逢周二、三、五刊出