模特兒出身，出道時有翻版劉心悠之稱，跟Janice Man（JM）和Angelababy份屬好姊妹嘅楊汀叮，最近決定同拍拖5年任職經理人，同埋已經係製作公司高層嘅男友Angus結婚喇！汀叮未婚夫以前係戴夢夢經理人，兩個人，仲不時傳出緋聞。
JM加國陪嫁
楊汀叮早年開始隱退，被私有化之後，已經甚少喺幕前演出同行騷，喺今個月25號汀叮同未婚夫Angus將遠赴加拿大註冊擺酒，到時JM會擔任伴娘，前亞生杜挺豪會擔任伴郎，婚禮籌備10個月，佢哋仲喺加拿大搵咗間古老大宅行禮，有氣氛又夠氣派。
噚日打畀Angus，佢透露早前同汀叮到布拉格影婚紗相，仲遊歐洲，之後佢透露求婚過程話：「嗰日封咗個朗豪坊條扶手電梯通道，搵咗3個人扮佢（汀叮）最鍾意嘅Care Bear，我就係其中一隻，佢好姊妹JM幫手，約佢去食飯，扮俾狗仔隊追，之後叫佢揀邊隻係我，最後佢揀中咗，我就送花同埋戒指求婚。」聽講當時有99支玫瑰同埋兩卡鑽戒，汀叮當場係感動到喊。唔知Angus會唔會請舊緋聞情人戴夢夢去飲，佢話：「唔會喇！我香港又唔會擺酒，咁遠費事打攪人喇！」
戴夢夢驚聞前經理人和緋聞男友Angus結婚，她說：「唔知呀！恭喜佢，百年好合，年生貴子，話晒以前經理人，如果請我，加拿大我都OK呀！」
撰文：馮仁昭
