嚟緊周日建制派有壇大龍鳳，齊齊去到維園反佔中，同日亦係「保普選反佔中大聯盟」舉辦嘅反佔中簽名結束日！咦，限期將至，唔知特區政府內，到底有幾多人響應狼英呼召，簽名反佔中呢？八方嘅鄰居季陶寫過，狼英視呢次行動為效忠與否嘅表現，唔簽嘅人肯定唔係自己友。如果係咁，政改三人組一定唔係自己友，事關政務司司長林鄭月娥同政制及內地事務局局長譚志源，至今都係未簽、亦冇話一定簽。
狼英「適當時間」先簽
其實喺狼英高調走出嚟向阿爺交心，話會簽名反佔中後，另一位三人組成員、律政司司長袁國強一早話明，為免日後處理公務時畀人偏頗態度，唔會簽名反佔中。至於林鄭同譚志源，只係話會喺適當時候「考慮」簽名。咁到底幾時係適當時候呢？當然冇講，但八方相信佢哋都唔覺得喺政改需要有商有量之際，簽名反佔中係有助凝聚共識，所以至今未郁手。而林鄭同譚志源嘅發言人都各自重申，「司長/局長支持任何推動依法落實2017年普選行政長官及維護法治的活動」，學狼英咁講咗等於做咗，以免被佢口實。
至於狼英，原來至今都係未簽㗎，但發言人話佢會喺適當時間以個人名義簽名，換言之未褪軚。八方聽聞反佔中大聯盟邀請咗狼英出席8.17遊行，莫非佢想壓軸登場，做最後一個簽名人攞尾彩？
李八方
mailto:[email protected]