曼聯突然下令，唔准球迷帶iPad呢類平板電腦入去奧脫福睇波，話就話怕球迷舉起部機影相時阻到隔籬左右睇波，但英國傳媒認為，曼聯實際上唔想球迷用部機拍片，保障番個轉播權。
就喺周二曼聯對華倫西亞呢場雲高爾主場處子戰前，曼聯球迷收到球會嘅電郵，提醒佢哋入奧脫福睇波嘅新規例。封電郵入面寫：「我哋提提大家，入主場睇波有新規例。球迷唔准帶大型電子器材入場（大於15cm x 10cm），例如iPad、其他平板電腦同手提電腦都禁止被帶入場。」據報，近年唔少球迷帶平板電腦入場，仲好鍾意舉起部機嚟拍片或影相，遮住坐後面嘅球迷睇波。不過，平板電腦已經非常普及，好多人都係機不離手，如果直情唔帶得入場嘅話，咪好唔方便囉！
但原來相比嫌麻煩，好多英國嘅曼聯球迷都喺網上大讚呢個新措施，有網民話：「做得好！你去奧脫福係為咗睇波㗎嘛！」佢嘅留言仲有超過600個人like咗。亦有網民話，你入到奧脫福係應該用對眼去睇波，而唔係用部機睇，「去得現場睇波，但竟然隔住部機睇，我覺得咁樣好差囉。」連內地網民都大讚新例，「球場入面用iPad影相實在太煩到人，唔擋住人視線會死呀？」
英國《每日郵報》就從球會利益出發，估呢項措施表面上係為球迷，實際上唔想有人影到場波，然後擺條片上網，影響轉播權收益。不過，唔少網民都認為傳媒多慮，「如果我有心拍嘢，我帶部最新型號電話仲好，一樣咁清，仲方便我揸機。」
尹佩斯波衫最好賣
另外，英超公佈上季球衣銷售榜，曼聯前鋒尹佩斯連續兩年第1，利物浦隊長謝拉特就排第2。喺前10名中，曼聯仲有排第6嘅朗尼同埋第9嘅香川真司。睇完呢個榜，我求大俠即刻明白點解曼聯唔放香川！