超人李嘉誠近年越來越多科技投資，舊年底佢預告過，將有新嘅手機操作系統（OS）面世，噚日超人旗下和記電訊（215）3香港，就獨家發佈採用Sailfish OS嘅Jolla手機。董事長Antti Saarnio發言時特別提到李嘉誠，形容對方係聰明人，曾預告有新機出現云云。但佢之後點都唔評論跟超人有乜關係，似係故弄玄虛。
2011年成立嘅Jolla有近八成半嘅員工來自諾基亞（Nokia），不過Antti冇講明，呢班員工係咪諾基亞前行政總裁Stephen Elop喺2010年上任後，為削開支連番大規模裁員，裁出嚟嘅舊部。
抄小米 Jolla僅限網購
帶有北歐口音嘅Antti話，Jolla規模仲好細，得120人，希望未來可以搶到5%市佔率。佢預告，Jolla幾星期後會進軍印度，跟當地電子商貿公司合作，對中國市場亦有興趣，可能跟阿里巴巴等電子商貿平台合作賣Jolla手機。
Jolla嘅銷售模式幾似小米，規定只係網上銷售，Antti又話預約名額好快爆滿，似係參考小米當年條銷售橋囉。不過，Antti噚日一聽到私隱，就反覆強調唔會擅自上載用戶資料，唔知係咪寸緊小米嘅私隱洩漏風波呢？
講番呢部定價2,888元嘅Jolla手機，只有音量調節、鎖機兩個實體按鍵，華華初步操作唔算特別習慣，皆因佢上下左右滑動都有唔同效果，好難記。而且佢嘅外殼係網民唔多buy嘅塑膠料，屏幕唔夠高清，難怪Antti強調，軟件先係佢哋嘅賣點！
李華華
mailto:[email protected]