蘇格蘭皇家銀行（RBS）噚日又傳出縮皮計劃。外電引述消息人士指出，RBS要將部份部門踢出核心商業區，由中環友邦金融中心嘅寫字樓，搬去鰂魚涌太古坊林肯大廈，將6萬平方呎嘅中環寫字樓削減一半。
有負責固定投資嘅員工就同華華講，佢都係睇新聞先知道呢件事，唔知佢哋部門會唔會受到影響。外電就話，私人銀行部Coutts & Co就會繼續留守中環，不過，其他部門嘅同事，就要喺年底前搬去太古坊林肯大廈。根據資料，中環甲級寫字樓第二季平均呎租96元，太古坊只係45元，RBS削減中環寫字樓面積明顯為省成本。
查實RBS唔係第一次節衣縮食，金融海嘯之後要靠英國政府打救先未致於執笠。今年2月RBS已經要實行開源節流措施，就連掛住「RBS」嘅銀色平治，都要換做日產七人車接送高層。