金融界立法會代表吳亮星上屆立法會會期接掌財委會主席，自評工作能力有60至80分，但搞到天怒人怨，建制派都頂唔順，有啲人私下話寧願由現任財委會副主席卿姐做仲好呀！之不過，建制派點會咁易放行？下屆會期已經協調好由自由黨張宇人再次任財委會主席。
卿姐又點會肯不戰而降？佢噚日同傳媒茶敍時被問到會唔會屢敗屢戰再競逐主席，雖然自稱未有決定，但本身「鬥志高昂」，換言之唔怕同張宇人拗手瓜啦。
但佢卻坦言要考慮泛民戰友嘅意見，話說唔少民主派戰友以至黨友都勸佢三思，一來建制議員佔多數，參選都係陪跑，而就算俾佢選到，喺咁嘅政治環境下，做主席都係吃力不討好！卿姐只稱做人又好、做委員會主席都好，最緊要處事公正，先會得到別人嘅尊重。