「一周三件」上月尾主打英皇證券（717），話該行係PE至平券商股；涉及證券業務而PB平霸嘅，就有威華達（622）。呢期券商股股價幾乎全部放紙鳶，威華達亦未認真郁過，一於飛撲威華達。
滬港通下有變身潛質
對上一次主打威華達，係今年4月10號（0.18元），最高見過5月15號嘅0.275元後，就一直打橫行。
呢段期間，市場炒小型券商股賣殼，炒滬港通，5月推介過嘅第一上海（227）升咗100%、東方滙財（8001）十個交易日升咗60%、新華滙富（188）亦喺上星期起步，同樣由5月中開始計，幾番翻半番。
落後信達國際（111），短短半個月，亦幾乎翻咗一番，威華達呢轉落後到痹。
威華達最新PB得0.46倍，上邊新華滙富PB已經上到1.3倍、信達1.7倍，第一上海挨近1倍，講PB，威華達平霸。又威華達前排發盈喜，嚟緊半年度成績單，已經冇問題，而呢轉盈喜，正係受惠投資增值，即係話，威華達PB分分鐘仲低！
威華達資產組合高達16.4億元淨現金，加埋9.6億元高流動性證券資產，總共高達26億元，超過集團最新市值18億元，係超級現金牛！呢筆資金，無可能長期擺喺銀行，收取微薄嘅利息收入，威華達遲早搵嘢搞。
再講，內地大把企業排隊等上市，加埋滬港通，香江殼股值租，若果用除息角度去睇，威華達市值得番1.6億元，啱晒市場需求，有變身潛質。
咪扯咁遠，呢轉買威華達落後，博破一年頂0.275元，當PB係咁意收窄到0.7倍，講緊已經貼近翻半番到0.37元，到時，威華達仲未有耐追到上邊行家。
錢雋
細價股專家
本欄逢周二、三、五刊出