在書局遇見一位多年不見的舊同事，三句唔埋，就呻樓價太高，買不起樓。沙膽虹驚訝：「你仲未買樓？由2007年就聽你說要買樓了！」他說：「係吖，2007年又覺得好貴，2009年金融海嘯後，施老闆（施永青）話樓市進入冰河期，諗住等吓先，之後梁振英上場，係人都話梁會推冧樓價，於是又等吓，政府出辣招後又加辣，諗住一定會跌，點知不斷升！」不少人的確諗住梁振英上場後，樓價會大跌，連超級大梁粉陳啟宗都跳出來預言香港樓市冇大茶飯食，樓價不跌到一仆一碌他不會入市，有些業主於是連自己自住層樓都賣掉，暫時租住先，等樓價下跌再入市，怎料偷雞唔到蝕把米，樓價賺少還得多付了租金。沙膽虹在2007及2009年皆曾建議這位舊同事買樓，原因很簡單，首先此君收入不錯，供樓綽綽有餘，其二當時按揭貸款是銀行同業拆息加不足一釐，每月供樓，供息部份微乎其微（借300萬元每月利息低於3,000元），大部份都是供本，相較付租金幫人家供樓化算。他問：「現在買唔買得過？」沙膽虹則十五十六，皆因現在樓價的確超貴兼非理性，而且貸款利率亦已升至2.5%，橫掂等了這麼多年，不如多租一、兩年等多一等！
沙膽虹
twitter賬號：khcheung1