首屆港超聯如箭在弦，但係幾支球會因為有球員入選港亞運隊，出戰下月嘅仁川亞運，相繼入信足總申請更改首兩周賽期，搞到賽事大執位，到底幾時開鑼都仲未知。其中東方就齋操接近3個月，到10月初先至踢第一場聯賽，可算係奇聞。
足總最初通知各港超聯參賽球會，因遷就9月初嘅國際賽賽期同月中嘅亞運足球賽，所以聯賽最早可能喺8月底開鑼。後來足總落實復辦慈善盾，由聯賽冠軍傑志對亞協附加賽出線嘅南華，賽期係本月31日，聯賽就要推到踢完國際賽後，即係下月中先展開，足總亦已抽籤定咗初步秩序，首周包括東方對傑志，同埋南華對飛馬嘅兩場重頭戲。
不過，港亞運隊早輪公佈20個球員名單，南華、傑志、東方、飛馬、流浪同澳滌都有兩個或以上球員入選，球會按例可申請賽事改期；據聞已有球會入信要求改期，咁樣首兩周賽程就大亂，而足總又唔想聯賽遲遲開唔到波，目前正同冇人入選亞運嘅球會溝通，希望協調到部份賽事如常喺下月中開波，只係首周幾乎肯定唔會有幾支爭標隊，戲碼自然弱好多。
東方齋操3個月冇比賽
東方總監梁守志承認，因為葉鴻輝同黃梓浩入選亞運隊，已入信足總要求首兩輪對傑志同南華延期，第3周就輪空，首場聯賽相信要到10月2日作客黃大仙，即係操咗成3個月先踢第一場聯賽。至於點解搞到咁，佢就苦笑話，呢個就係香港足球，由於有排先有正式比賽，近期都寓賽於操，今朝會同大埔拍跳。
傑志噚朝復操，助教鄭兆聰就話唔清楚幾時踢首場聯賽，淨係知月底會喺慈善盾對南華，而現階段會先集中應付亞協8強賽事先。