港股噚日朝挾高逾200點後，收市仍升314點，但大價股下晝橫行，令升市主板成交只得657億元。另要注意，係升市龍頭股港交所（388）出奇地唔強，噚日升1.4%勉強跟大市同步，180蚊阻力破極破唔到。滬港通臨近大戶對加唔加注買港交所有一定猶豫，面對最有concept嘅藍籌股都可以咁冷靜，相信其他大價股好難進入瘋狂狀態。睇返恒指只要再多一兩日，就形成RSI雙頂背馳，破頂後大價股風險偏高。如閣下近期十分進取，持倉偏多嘅話，晉佳認為，恒指挨近25000點，就點都要減持，大價股食糊，然後再將部份資金炒細價股，應該係較佳策略。
非指數股裏面，論滬港通概念，中資券商近期整固，大折讓H股呢轉又撻唔着，得番幾個億元市值嘅本地券商股喺度炒。反而IGG（8002）搶眼啲，過氣嘅手遊、支付股噚日都翻生。有concept炒過，過氣嘅都翻兜埋，嚟緊可以睇吓啲低沉半新股，當中，暢捷通（1588）質地唔太差，係用友旗下從事小微企業管理軟件嘅公司，睇吓有冇得炒番轉。
港股嚴重超買過後斷估距離見頂不遠，兩三周內見頂，之後會進入幾個月調整，問題係港股會大跌，定係好似上半年嗰種上落市整固走勢。如果係前者，當然手上股票越少越好，如果係後者，從基本因素出發買二三線股，可能都有得賺，就好似上半年隻瑞聲（2018），半年升幅37%，買中都幾和味。
揸一年回報料可人
要搵呢種值得中線持有嘅股份，可留意海天國際（1882），佢主要從事注塑機業務，競爭力明顯比起震雄（057）高，嚿年收入升13.6%，至72.01億元人民幣；純利升22.3%，至12.06億元人民幣；毛利率由30.1%升至31.6%；每股盈利0.76分，市盈率大約20倍。
注塑機行業並非高增長行業，只係海天國際競爭力較高，盈利穩步上揚，只係2012年盈利曾倒退，嚿年已返回正軌。另海天估值溢價有部份係來自3D打印業務，嚿年野村曾經發表報告講到海天擁有3D打印設備嘅技術，過咗一年，研發方面或有改進，雖然炒作熱潮過咗，但概念猶在。
海天5月因為中越糾紛而要停廠，預咗上半年業績會受到一定負面影響，但5月中發公告話越南廠房暫停運作之後，股價隨即見底回升，3至5月形成雙底，上個月喺頸線17蚊左右守得穩，而家喺18蚊邊跌唔落，走勢相當唔錯。呢隻股你要佢升得快唔容易，但係一年後可能會有唔錯回報，以券商預測出年市盈率14.9倍計，12個月目標價以22倍定價，可上望27蚊，潛在升幅近五成。
晉佳
版面調動關係，晉佳暫代王昇一天。