贏過13場，累積獎金達5,700萬嘅前馬王「雄心威龍」，缺陣超過15個月之後，腳患已經好得七七八八，今季一早就開操，呢朝(11日)繼續做工夫，由副練余詠詩踱步，操完聯同其他苗廐馬，喺機坪氹氹轉，苗禮德隻隻都唔理，淨係走去「雄心威龍」度，向余詠詩查問該駒進度，就知佢對「雄心威龍」仍抱好大期望，力求喺10月5號1400米三級賽慶典盃復出之戰有好表現。
另一邊廂，另一匹明星馬張智霖同郭富城合夥嘅「愛將」，康復進程就冇咁順利，呢匹馬去年12月上旬跑第二後再冇出賽，Chi Lam曾接受訪問，承認愛駒嘅左前腳傷患都幾嚴重吓，但就未需要同幾位合夥馬主夾錢畀醫藥費，之前贏落嘅獎金，仍夠佢睇醫生。
本來「愛將」已有啲起色，養傷多時後，8月3號見佢復課，可惜操咗三日就停兩日，8月8日再出現踱步，但之後又「失蹤」，睇嚟健康仍反覆。「愛將」至今六戰四冠兩亞，實力唔使懷疑，肯定係質值一班嘅短途惡馬，但城城同Chi Lam能否再一齊拉頭馬，始終要睇愛駒好唔好得番！