【中環】譚詠麟（阿倫）一向鍾意熱鬧，同紅顏知己朱詠婷（Wendy）出出入入，無論睇戲、打羽毛球同食飯，都會拉埋其他朋友，一班人高興之餘，仲可以幫手掩人耳目。上個禮拜五阿倫同Wendy去中環食晚飯，就約埋好友周文曦一家同張智軒等，Wendy專登揾個角位坐，保持低調，至於阿倫同Wendy個囝囝曉風就唔見影。
分車走人
當晚大約7點半，阿倫、周文曦同佢太太崔加寶一家去中環九如坊大班樓食飯，阿倫一入食肆，即頭岳岳搵冷氣吹風位，佢嗰日下晝曾經喺微博上載兩張打羽毛球嘅相，可能係啱啱打完波，所以個身仲好鬼熱。
成餐飯食足兩粒鐘，走嘅時候阿倫先等Wendy同崔加寶離開同上埋七人車，佢先出嚟坐另外一架車走。之後阿倫發現記者，就笑笑口咁指住記者鏡頭揮手拜拜，食飽飽心情果然好鬼靚。
採訪、攝影：朱志聰、李志明、潘冠恩