有線（1097）主席吳天海甚少現身馬場，唔似愛馬之人，噚日竟然以跑馬做比喻，批評政府發新電視牌，冇優惠措施之餘，反而加入不少辣招，對新經營者不利。
佢形容，翡翠台係「馬王」，有線旗下奇妙電視作為新馬，被要求負重廿磅兼跑外圈，十分不公平。
吳天海狂呻話，5年前提出申請免費電視牌照時，本港兩個免費電視台翡翠台同本港台，市場佔比係八比二；時至今日，本港台五甲不入，「排一至四位嘅，分別係翡翠台、高清翡翠台、J2和inews，第五有時係Pearl，有時係本港台。以跑馬嚟講，翡翠台係馬王」。
佢又認為，賽馬引人入勝嘅地方，就係新參與嘅馬主，仍有機會贏，「但奇妙電視作為新馬，被要求負重廿磅、仲要跑外圈，點贏先？」被問到奇妙電視呢隻「新馬」會否棄跑？佢就話，要視乎政府係咪真係有心，想市場出現競爭嘞！