上交所七名高層今日專登喺香港開場座談會，為一班本地券商講解滬港通下，買賣A股嘅流程同埋介紹A股市場，讓本地券商可以做好準備。不過，聽聞座談會幾滯銷，暫時出席人數只得25人，以本地中小型經紀行為主，本地中資券商嘅代表就聊聊可數。
聞說，上交所早前搵港交所（388）幫忙廣發英雄帖，向包括香港中資證券業協會等多個經紀商會發出邀請函，邀請商會代表同埋旗下屬會會員出席座談會。原本港交所都以為有上交所作號召，一定吸引到唔少本地中資券商搵人撐場。點知去到上星期尾截飛時，先發現好多本地中資券商根本唔知有場座談會。
證券業界就有流傳話，中資證券業協會主席閻峰覺得滬港通令本地中資行利益受損，所以都唔係好積極幫手推動，所以冇話畀班會員聽有呢個座談會。
但據了解，閻峰今日會現身座談會，係咪想用行動粉碎傳聞呢？