世上冇無緣無故嘅愛，亦冇無緣無故嘅恨，八方則覺得，喺建制派陣營，唔會有無緣無故嘅落力，亦都冇無緣無故嘅放軟手腳，而喺反佔中一役賣力度不下於周融嘅民建聯北區委任區議員陳勇，明顯唔會冇所圖啩！
建制派陣營已經熱傳陳勇「篤定」喺2016年嘅立法會選舉，替補劉江華出戰超級區議員，同副主席李慧琼拍住上希望搶到兩席！要選超級議席，知名度好緊要，陳勇必須靠呢壇反佔中發圍，爭取更多愛國愛港市民支持，以便一旦落場，擁有新界社團聯會後台嘅佢，可以吸到新界東西票源，李慧琼則主打港島同九龍區，民建聯希望分票清晰下，唔會再好似上次咁兩個只能活一個。
而要選超級議席，陳勇必須先成為民選區議員，據聞民建聯已經喺大埔搵到個好位畀陳勇落腳，部署入場。