利申：這個所謂真人騷我只看過開頭三分鐘，雖然夠資格不過不夠資料所以未曾想過寫評價。最衰James項明生，寫得如此到肉精采，對唔住都要，不問自取，真係唔share唔得！坦白從寬，今篇稿費捐去邊，等候項總發落。
以下乃是一字不漏從面書抄下的原文：「終於看了話題之作《沒女大翻身》，真人秀比電視劇更吸睛，何況來自《盛女》的岑應，聽落又好似很有道理。因為我們身邊總有一兩個不着邊幅的男人婆、不化妝的街市婆、惡死能燈的公主病、懶到出汁的大肥婆……
（Son姐按：我有齊以上四種特質，有理由懷疑可能係影射我！）
但建議家人陪同小童觀看。因為潛藏的價值觀很有問題：女人要瘦才靚、不扮靚沒有前途、老婆一定要小鳥依人老公才不出去滾、女人生存就是為咗嫁人……
改了一個新興網名『沒女』，掩飾不了這些民末清初的小農價值觀，古老當時髦，仲裱起來當牌坊膜拜。
真正應該送去《大翻身》改造改造的是，嗰啲尖酸刻薄所謂『導師』。
講到尾，街市婆不化妝，有問題嗎？懶到出汁？似忌廉貓哦。唔結婚，呢個係佢自己嘅人生。男人婆穿着求其，佢鍾意，有態度！肥胖，不是罪，雖然我瘦，不過我都好欣賞楊貴妃好肉地㗎！
（註：我去旅遊時認識了一個肥妹團友，她懶到成日唔肯落旅遊巴，『導遊，出邊好曬，我喺車度等你哋返來！』不得不承認，我有少少鍾意佢咁可愛坦白的性格）
香港社會剩下最可取的地方是，我們是一個多元化的社會，不需要幾百萬個一模一樣，徒具外表由所謂『導師』拋光打磨、內裏倒模小農價值觀的沒有性格、沒趣女人，真正沒女，清末的沒女。」
張慧敏
http://www.facebook.com/HKcareerdoctor