2013年有隻神話股升五倍，由六毫升到三個幾，今年最高。仲要見4.5元。邊隻？就係彩星玩具（869）。老股民都知彩星玩具廿幾年前係靠三齣忍者龜電影，令佢哋做當年嘅神話股。舊年，忍者龜卡通喺花旗國電視台開始播，相關玩具喺當地大賣，令彩星玩具嘅營業額升咗四倍半，盈利升差不多12倍。
點解孫柏文你今日先推呢？原因係啱啱過咗嘅周末，廿年來第一齣「真人」忍者龜電影上畫。呢齣戲，到上個禮拜，都係俾啲影評媽叉，話低能。因為咁，彩星玩具嘅股價就由年初高位4.5元，一路下滑到上周五收市賣2.8元。
點知，喺啱啱過咗嘅周末，齣戲成美國票房冠軍，歷史中8月份開畫第四高票房，仲要觀眾畀嘅評份，阿爸級有B，小朋友就A。點知噚日，呢個消息令彩星玩具裂口高開後，由全日最高差不多3蚊，跌到落2.66元收市。
其實，我一路都跟彩星玩具，而今日以「不問價追」去推介最主要有兩個原因，就係因忍者龜未來明朗化。而落到呢個價，市盈率冇6倍，已反映市場覺得忍者龜概念「係咁多」。
舊年靠電視卡通，忍者龜玩具喺美國開始好賣。今次電影出台，由全球票房數據睇已成忍者龜玩具進軍全球最佳廣告。據製片人嘅風聲，富中國特色嘅角色會喺啲續集中陸續出現，令啲玩具長賣長有。
大陸角色？乜咁似變形金剛嘅？係。咁變形金剛賣來賣去都係隻死人拖頭柯柏文，可以賣幾多玩具呀？忍者龜同變形金剛系列都係同一個製片Michael Bay，變形金剛第一集喺2007年出台時，做佢玩具嘅孩之寶，股價走勢同彩星玩具一樣，由十幾美元升到33美元又跌落21.5美元。
點知喺啲玩具銷售數據入來後，一年內升穿40美元。到今日四集同派咗好多股息之後，喺歷史高位賣50美元一股。忍者龜概念「係咁多」？柯柏文唔同意。歷史如翻版，彩星玩具就升穿5蚊，現價超高值博率，仲唔不問價追彩星玩具？
孫柏文
獨立股評人
http://facebook.com/shuen
本欄逢周二刊出