模特兒係賣青春、美貌與身材嘅行業，唔能夠做一世。女仔模特兒要搵後路，最簡單當然係泊到好碼頭，即係嫁個有錢人或者搵到富豪男友喇，要不然，可以實際啲出錢出力發展一門生意。名模Cara G.本月初就喺出名貴租嘅中環IFC商場開咗間蔬菜果汁店。
Cara G.間果汁店喺正另一名模Amanda S.間餅店隔籬，店舖面積大約100平方呎，佢唔肯透露租金，只係話佢跟拍檔Melanie White喺2011年合作經營果汁生意，首年已經有錢賺。選擇喺IFC開店主要睇中呢度多寫字樓客，佢哋工作繁忙，未必有時間做運動，但就注重健康兼且花得起錢。
的確，呢間果汁店嘅果汁唔算便宜，每枝350毫升，售價介乎42元至72元，大部份要50、60元，以呢個價錢，去普通茶餐廳應該食到兩餐。
Cara G.上星期一身便服在場睇舖，不時落力向顧客介紹產品。佢話，當初決定創業，主要係想做啲需要用腦袋嘅工作，但會繼續兼顧模特兒工作。原來佢13、14歲已開始工作，中學都未畢業，社會經驗令佢學識營商之道，下一步，佢計劃衝出香港，將業務拓展至東南亞。