記得中國女排到埗時，副攻楊珺菁攬實隻熊仔（右圖），一啲都唔似國內傳媒冠以嘅「暴力副攻」稱號。噚日佢貢獻11分，幫中國封后，賽後就好開心話公仔係爸爸送，已經跟咗佢7、8年，每次出國比賽都要帶住先安心。對於「暴力副攻」呢個稱號，佢唔覺係貶義，反而話受之有愧，因為覺得自己仲要多啲磨練機會，先做到咁有力量。