內地熱爆歌唱show《中國好聲音》，來自香港嘅陳樂基，唱咗李克勤嘅《月半小夜曲》技驚四座。無論陳樂基今次會唔會勝出，但至少佢揀啱咗嗰市場，今時今日先講進軍內地市場，未必係最佳時機，但錢途無限。如果你唔識唱歌，識寫字都有機會做千萬富豪。強國已經步入流動世代，好多人用手機上網睇視頻或者小說，並冒起一班網絡作家，佢哋可以一本書都未出過，但每年淨版稅收入已過千萬人仔，做埋土豪。
香港有四大才子包括金庸、倪匡、黃霑同蔡瀾；強國亦有四大網絡作家包括張威、李虎、劉煒同朱洪志，最細嘅只得25歲，最大亦不過係33歲。其中筆名唐家三少嘅張威，前年嘅版稅收入高達2,650萬人仔，榮登收入最多嘅網絡作家。其中一本《鬥羅大陸》仲被改篇成為漫畫同遊戲，產值估計超過10億人仔。網絡作家文筆未必最好，但係故仔會令讀者有共鳴。追睇網絡小說絕大部係離鄉別井嘅民工，九成讀者係男仔，以月薪平均三、四千人仔計，要佢哋平日花幾蚊人仔睇小說，絕對負擔得起。
網絡小說可以籠絡呢群讀者，全因故事可以反映唔少民工嘅渴求，就係想買樓同結婚，令讀者容易代入角色。據張威嘅經驗，故事背景最好係古代，創作空間大之餘，又唔會咁容易俾阿爺審查。而最重要緊係泊到好碼頭，搵到一個好網站發佈兼吸納讀者。
C+B
本欄逢周一刊出