美國游泳錦標賽繼續喺加州進行緊，年僅17歲嘅「新小雲雀」列迪姬越戰越勇，上周六喺女子400米自由泳決賽造出3分58秒86嘅時間，破咗封塵5年嘅世界紀錄。
短至200米、長至1,500米都一樣游得咁叻嘅列迪姬，早幾日贏完200米同800米自由泳冠軍之後，上周六出戰400米自由泳當然冇甩拖，由頭帶到落尾，佢head住嘅唔只係隔籬線嘅對手，佢仲全程帶住條睇唔到嘅世界紀錄線游㖭呀！雖然列迪姬喺最後一個塘回程時留力減速，但都足以打破由意大利嘅比姬蓮莉保持咗5年嘅3分59秒15紀錄。
費斯：佢鬥心好強
人哋當年要靠超級泳衣先造到嘅時間，自己𠵱家輕輕鬆鬆就可以破到，列迪姬梗係好滿意啦，仲話覺得自己今場嘅表現近乎完美㖭。經過呢一役，佢同時係400、800同1,500米自由泳嘅紀錄保持者，亦成為8年嚟第1位錄得呢個彪炳戰績嘅女泳手。呢位高中都未畢業嘅小妹妹，其實喺預賽已經成功4分鐘內游完全程，去到決賽仲游得快咗，連大師兄費斯都讚佢快。費斯仲話，列迪姬喺呢個項目1日游足兩次，都仲可以喺4分鐘內完成係好難得，又話對方嘅爭勝心非常之強，喺場比賽完全展示咗出嚟。
至於「女費斯」法蘭克琳，同日喺100米背泳決賽以59秒38嘅時間率先觸池，連贏5屆冠軍㖭。