周融同民建聯前日唔該都冇聲，踩入鄉議局主場搞反佔中大龍鳳，慷慨激昂吹雞，新界王劉皇發同成班鄉紳好似變晒臨記，班威慣嘅鄉紳唔㷫就奇！有鄉紳同八方講，其實佢哋對周融好有意見，背後嘅「深層次矛盾」非同小可，除咗嬲狼英、西環唔睇佢哋台戲之外，早排南下宣旨嘅人大委員長張德江竟然唔點佢哋燈，鄉議局冇得去深圳領旨，搞到班鄉紳嬲嬲豬！
有鄉議局嘅鄉紳透露，其實新界人對周融班人搞反佔中冇乜好感，因為最熱衷反佔中嘅狼英，一直冇畀面鄉議局，唔好講話佢嘅土地政策一直針對新界人，鄉議局兩次請狼英去新年團拜，狼英甩足兩次底，咁唔畀面，鄉紳梗係唔妥狼英，唔想為佢抬轎反佔中啦。
除咗嬲狼英，班鄉紳仲唔妥西環有事鍾無艷，無事夏迎春，平時冇乜着數畀新界人，但每到選舉，或者今次反佔中要吹雞晒馬，就識搵佢哋call馬同照肺，為狼英、民記抬轎。張德江早前南下宣旨，見咁多香港政商界人士，但愛國愛港更愛黨嘅鄉議局竟然冇份見，擺明唔畀面佢哋，難怪西環要鄉議局交個主場畀周融同民記搞反佔中誓師，有鄉紳忍唔住要爆啦！
「港島暴動新界仲有利」
有鄉紳仲話，有言在先，其他人點諗佢唔知，佢同班老友就買定花生做反佔中花生友，若然劉皇叔喺8.17反佔中遊行獻花，冇得企龍頭，佢哋班鄉紳隨時反枱唔去，「咁熱去遊行，不如留喺屋企瞓覺好過」。有人更揚言：「香港島若然暴動，其實新界仲有利。」八方都明白，香港若然唔立立亂，鄉紳又點樣吊高嚟賣，搵機會為維穩立功呢？
李八方
mailto:[email protected]