澳門將有多間新賭場陸續落成，新賭場要周圍挖角搵人，令員工籌碼增加，近月更不時有賭場員工遊行爭取改善待遇，逼使多間賭場相繼加薪、派股或多派花紅。暫時就未聽見「賭王」何鴻燊旗下澳博（880）有乜動靜，賭王四太梁安琪上星期向員工發出通告，都只係邀請員工對公司花紅、獎金或獎勵計劃發表意見咋。
澳博董事梁安琪上周四以澳博員工福利諮詢委員會主席名義向員工發通告，話知道有行家向員工派股、派花紅，明白澳博員工都等緊消息，不過佢話，公司已先後推出更好嘅升職制度，又改善咗新葡京員工飯堂嘅膳食，日後會繼續推出改善員工福利嘅措施云云，暫時冇講明會否用銀彈政策留人，只係邀請員工畀意見。
不過，澳博行政總裁蘇樹輝今年初講過，送股畀員工「搶壞市場，唔係好事」，又話未來咁多畢業生加入職場，請人壓力唔大，似乎幾老定。