京官南下唔見鄉紳，搞到鄉事派打爛醋埕，有個獲「寵幸」到深圳見京官嘅富豪，面聖後滿懷心事而歸，八方噚日同佢飲早茶，富豪呷啖壽眉後話，政改一事，阿爺一定企硬，睇習總打老虎個勢，泛民即使佔中，都唔慌有運行。
富豪話早前去深圳見京官，預咗要聽指示反佔中，亦有心理準備要使啲維穩費，點知京官原來唔止講金，話政改大事，關乎國家安全、民族利益，管好香港，係實現中國夢嘅一部份；富豪此時飲啖茶，八方有機會插嘴，話中國夢習總成日講，有乜特別？
富豪好客氣，夾嚿豬膶燒賣畀八方後話，京官講「你們不要傷了中國心啊！」講到呢度，富豪冇乜表情，話伯爺嗰代領教過共產黨手段，當黨員同你講心唔講金，就要好自為之，因此佢近日都同子姪講呢番話，八方追問佢即係有何打算，「我哋唔係要get rich，係stay rich啫」。明未？