搞Startup一大難，是在不同階段，要用上截然不同的心法。
有關做Startup的技巧分享，近幾年多了好多，網上大把，有心找的話，只會苦惱太多，不是太少，現在就算在香港，幾乎每個Startup人，都至少講得出甚麼Lean Startup、Launch Fast Fail Fast等等。
量是升了，但都集中於有關創業的最早階段。行得稍為遠一點之後，要找到有用的實戰經驗分享，就沒有這麼輕鬆。大概是供應上，成功開到個頭的人，比成功行遠的人多好多倍，而需求上，剛起步的人，又比走完頭段的人多好多倍。
慣手勢好難改
如果開頭同繼續行，兩段路講求的東西類近，就好辦。當然事情永遠不會這麼容易，兩段路不單止不一樣，甚至可以完全相反。例如，開頭一段，人人都識講，錢要慳住使，人少好辦事，儲糧延長起飛跑道。但好明顯，去到某個位，總要投資未來，總要擴充加速燃燒，否則永遠長不大。
又例如，開頭一段，未掌握到產品的方向，大家都識講，不要做精品，快快手出到街，睇反應先算，質素測試等等可免則免。但又好明顯，去到某個位，就不再是一味快，總要認真看待產品質素，否則會流失用戶，結果也是走不遠。
明白有轉角位，不難，甚至轉角位在邊度，也不是好難知道。最難的，有兩樣，一，是好多時，太專注做，無留意自己去到邊個位，到了轉角位也不知。尤其是人少的時候，創辦人一兼九職，CEO都只有時間畫圖寫code填他媽的MPF表，基本上，即是無CEO，人人低頭盯着軚盤，無人得閒抬頭睇路。我自己第一間Startup頭幾年，就是這個樣子。
二，就算有睇路，覺得好似快要轉角，但之前行頭段時，慣了手勢，好難改，尤其頭段越行得耐，越難改。例如，行了三年，都是極精簡人手，到了心想可能是時間踩油擴充，身體卻動不來，然後就同自己講，可能未到，再睇定些先，一季又一季，一年好快拖過。
又例如，覺得是時候要讓一讓推新功能的速度，多做測試，但團隊幾年來慣了流程節奏，對改變有微言，然後你又同自己講，其實可能未到，又睇定些先算。階段之間，越快越好，不單止是因為快些到岸，也是因為一旦在某階段呆得太耐，可能就從此以後膠着了。
宋漢生