港交所（388）行政總裁李小加果然係做記者出身，寫文章、打比喻一流，佢曾以水同魚分別比喻人民幣流量同埋人民幣產品，講解人民幣回流機制。噚日佢就將中港市場比喻為兩種形狀嘅水管，滬港通正好係連接轉換器。照咁講，李小加係咪變成水渠佬呢？
李小加透過最新網誌，將中港兩地市場比喻為不同水管，香港嘅水管係方形，內地就係圓形，兩邊閥門結構同水壓都唔同，滬港通正好等於一個連接轉換器，要喺確保兩邊水管形狀不變嘅大前提下，保障水流暢順。因此，滬港通推行初期需要就額度、投資者門檻等設有一定限制，但佢肯定，當滬港通運行一段時間，限制會越來越少。
另外，佢仿傚個別好鍾意寫網誌嘅政府高官，打算喺未來一兩個月，繼續通過網誌回答投資者有關滬港通嘅提問喎。