左丁山一代，睇「中國學生周報」長大，入大學後就睇「大學生活」、「盤古」，更有人自小睇「兒童樂園」，考中文時就買友聯活頁文選嘅古文閱讀（好似係兩毫子一篇），呢啲全部係「友聯」嘅直接間接業務，讀「香港文化眾聲道」（第一冊）（三聯有售），就知道最初全部由美國亞洲基金資助，但美國人出錢啫，並無干涉或指揮編務，辦事方面，友聯有何振亞、林友恆等及理事會主持，實際負責編務有余英時、奚會璋、古梅、孫述宇、陳特、陸慶珍（陸離）、張浚華等新亞校友主持，故此友聯與新亞人有密切關係。後來新亞開始「脫貧」，離開桂林街，得雅禮協會支持，在農圃道興建校舍，也是拿美國人的錢。據奚會璋大師兄在本書憶述，亞洲基金一位代表James Ivy，到福特基金會任職，力主資助新亞，因福特基金會不可捐錢予外國機構，故此因時制宜，透過雅禮協會「轉贈」建校基金。至於亞洲基金與CIA有無關係？奚先生話60年代佢地意外地睇到一篇報導，發現亞洲基金與CIA有關係，以後大家鬧得不開心，到咗1970年初，友聯全盛時期已過，旗下刊物也就陸續淡出市場，但「中國學生周報」培養出來嘅一班作者如劉天賜、李天命、羅卡、披圖氏、綠騎士等等等，美國錢資助香港文化教育機構十幾年，但發揮嘅影響力幾十年。
新亞離開桂林街後，原址破落，深水埗區亦老化得厲害，於是市建局幾年前向居民收回舊樓重建，今已落成，據黃英琦在佢嘅「am730」專欄（八月五日）講：「右轉到桂林街，迎面而來的是幾幢宏偉嶄新的住宅樓宇，還鋪了雲石外牆，在殘舊的唐樓圍繞下，這種『巴閉』顯得格格不入。記憶中，那是桂林街新亞書院的舊址。……新住宅大樓旁將有休憩空間，市建局決定把它命名為『新亞書院紀念』花園。可是，這種缺乏人文精神的重建與新亞的『艱險我奮進』精神價值背道而馳，叫『新亞書院紀念花園』合適嗎？……如果我是新亞人，我不會想將這種樓宇和旁邊的花園與新亞拉上任何關係。」黃英琦做灣仔區議會主席時，堅持原區風貌與市建局紮晒馬，估唔到佢行過桂林街又鬧市建局一輪，明日再談。