【本報訊】「入實驗室㩒緊急掣」這句繞口廣東話，移居香港才八個月的新移民學生陳志強，開始時花了一星期才學會，但他現已可流暢用粵語交談。他認為粵語就是香港文化，不認同以普通話作為教學語言，因此加入「普教中學生關注組」保衞廣東話。
記者：倪清江
現年20歲的阿強去年12月持單程證，與母親由江西來港與父親及讀小四的弟弟團聚。原在江西已獲大學取錄讀政治學，來港後自資專上院校取錄他讀副學士，但他也放棄，選擇入讀新界喇沙中學，由中四開始讀起，下月升中五。阿強說：「佢（校長）叫我諗清楚，我保證一定唔會嘥咗兩年，一定可以考到個好學位，突破自己。」
參加普教中學生關注組
阿強在江西時說客家話，學普通話也得由拼音學起，原本聽不懂粵語的他，用同一方法學粵語，首先克服粵語的尾音m、n、k、b，「香港人好好，都肯教我，『入實驗室㩒緊急掣』，學咗一個禮拜先學到」。他最初把「好得意」說成「好da意」，成了同學喚他的花名，但現在快速說「黐線蜘蛛黐住支樹枝」都難不倒他。
「我最大優點係面皮厚，人哋點笑我都可以，我自己努力去學。」他指同校也有不少新移民學生，但他們在自己圈子說普通話、寫簡體字，與本地同學疏離，「好多同學唔鍾意佢哋，因為佢哋唔學廣東話，認為講普通話係OK」。
他認為，在港居住一定要學好粵語，「呢個係文化，我唔係為咗喺香港發展，係為咗保護香港本土文化，所以我都參加『普教中學生關注組』行動，保衞廣東話」。很多人笑他作為新移民都加入該關注組，他卻不以為然，「因為廣東話最體驗到香港文化。如果你連自己語言都保護唔到，你可以保護啲乜嘢？」
阿強認為，越來越多學校以普通話教中文，予人矮化粵語感覺，「唔希望所有學生都講普通話，（否則）香港唔係香港，只係大陸某一個城市」。他認為普通話可以是一個學科，但不應連歷史科、中國文學科都係用普通話教。
他指普通話是一個溝通語言，「其實冇幾多文化喺裏面；廣東話係古老語言，有廣東特色文化……學校講普通話，你會同下一代講普通話定廣東話？一定係普通話。廣東好多城市都係咁，語言保護係好重要」。
在江西用繁體字做功課
其實阿強在江西時已是另類學生，因為他三年前開始，堅持做功課寫繁體字，只是考試時寫繁體字會被當錯別字，而不得不以簡體字作答。「因為我鍾意中國文化，文字都係由簡到繁，冇理由突然間由繁變簡，呢個係文化退步。」不過他不認同用殘體字稱呼簡體字，認為是對使用者不尊重。
阿強考試成績全級首10名內，中文全級首二名，但英文仍須努力。他夢想考入中文大學中文系，畢業後當教師教中文，有信心日後可教學生純正粵語發音，他指本地學生中文普遍較差，「所以我想去教佢哋中文，我逼我細佬背千字文、三字經，因為我知香港學生係唔背書，中文好難學得好」。