明星馬有兩種，一種係憑本身出色表現，吸引公眾注目，成為馬迷偶像。好似經典一哩賽盟主「步步友」同上季五戰四冠一亞嘅「戰利品」，就係屬於呢一類。第二類就係演藝界明星擁有嘅馬，上季呢類馬唔少都好似佢哋嘅主人咁，同樣星光熠熠，最經典莫過於大哥大洪金寶隻「崇山寶」，全季喺香港三戰兩勝後，去到杜拜照贏一級賽為港爭光；而新晉演員鄭家星，佢爸爸東莞首富鄭強輝嘅「威爾頓」，更連勝三場一級賽，做埋香港馬王。
不過唔係每位明星嘅駒都順風順水，樂壇校長譚詠麟隻團體馬「財神駕到」，全季跑咗15場都贏唔到，其中14次三甲不入，成為最霉「明星」馬，不過最後一仗泥地放到終點前，先至被「彩利」追過僅敗得第二，其實已明顯復蘇。呢匹馬前季喺四班三捷，家陣喺五班評36分，一定有着數，今季阿倫想重踏凱旋門，應該好easy啫！