粗暴通過東北發展前期撥款嘅立法會財務委員會主席吳亮星，當日喺一片混亂中表決撥款。立法會上周終於將當時成個表決過程化成逐字記錄本，成為歷史紀錄，內容似足鬧劇劇本，短短一分鐘嘅表決鐘聲，單係「多位議員繼續高聲反對」一句就出現咗六次，記錄又夾雜「多位議員高聲反對進行表決」、「高聲抗議」。
呢一分鐘電光石火之間，白鴿黨黃碧雲叫咗六次「吳亮星下台」，除咗呢句，一嚿雲好似乜都唔識講。工黨李卓人就好啲，指出當時吳亮星唔畀問問題，違反議事規則，要求主席不能表決，鬧吳亮星夾硬打茅波，亦表明當時一眾泛民並冇核對表決結果，證明當時嘅表決係何等粗暴。