最近，大市比想像中跌得多，股評人開始為解釋而解釋，其實多數都係跟住價位來講，如果將近日的負號變成正號，可以係同一個消息完全不同的演繹，咁又唔怪得人，主播問你條問題幾十字，唔係咁易有勇氣答兩個字「唔知」，畀你張士佳去答，咪又係咁。其實，唔使理我哋講咁多，揸住大方向去做，當前大方向主要有四個：（一）美俄角力，俄國資金進駐；（二）國策改革；（三）中港股票互聯互通；（四）阿里巴巴上市，其他都係噪音嘅多。
每一日嘅噪音，令股票市場上上落落，亦令人唔易估前路，不過好彩投資唔係靠估，因為經常估唔到，係要做what if，同埋諗返先前嘅what if，唔可能前幾日先覺得如果跌啲畀我入就好了，咁現在四大方向冇變，只係大市跌咗，就諗係唔係要走，能幫現在的決定去留，是過去的what if，如果你先前無準備what if，無辦法，但此刻就要開始做，因為能幫將來的，就是今天所做的what if。
內房似唞氣 紅籌改革強勢
眼前最大變數當然係伊波拉，what if伊波拉疫情失控，其實可以很大鑊，但全世界都唔理，得你一個擔心，你可以很大鑊，所以我自己一於唔理，用一批有代表性的股票去訂些嚴謹止賺位，情願中了止賺，走錯咗，遲點買番。
第一上海（227）係標青滬港通概念股，有啟示作用，上星期出盈警，明知盈警係無關，因為升是由於滬港通，滬港通都未開始，過往的業績根本無啟示性，這點你知我知基金經理知，但上周四照跌13%，即係沽細價AH價的力量遠大於揸，與前段日子有所不同，一日唔代表晒，上周五，第一上海輕微反彈，加上美股上升，咁先前低位1.7元就係關鍵價位，如果跌穿關鍵位，咁即係一眾滬港通股小心啲，這批股份，大多都係業績麻麻，如果唔係都不用扶持，呢類型股票跌起上來，唔係人咁品，既然有斬獲，情願錯過，好過做錯。
另一些有代表性的股是內銀內房。世茂房地產（813） 、中國海外（688）已轉弱，一隻唔代表乜，但已經兩三隻都係咁，初步睇，內房要唞氣，既然市場咁多選擇，不如全部內房走位，情願等re-entry。內銀股好一些，建設銀行（939）、工商銀行（1398）等出支陽燭，再穿近期底，都唔係似樣，照辦煮碗，穿底走走位先。
另外一條主線係紅籌改革，呢批明明有官方背景但又喺香港（或者其他中國以外地區）註冊嘅紅籌公司，當年雖然係為改革而生，但慢慢就變晒土皇帝，連中央都冇符，咁終於等到中信泰富（267）同華潤系都出事，加上反貪腐之風，當然要乘機整頓，紅籌公司係邊間差就搞邊間，好似光大控股（165）咁錯漏百出，就當然要重組！
可以相信，呢次整頓唔會咁快完，所以除咗之前喺電台提過嘅中信泰富、招商置地（978）、香港中旅（308）等等外，嚟緊凡親有紅籌出現異動，其實都應該睇高一線。
講唔晒咁多，提提愛股港交所（388）和騰訊（700）同一眾殼股，可以講唔係咁關事，炒還炒、揸還揸，呢堆揸嘅暫時點都唔郁住。
張士佳
註：筆者持有中信泰富、香港中旅、港交所、騰訊、招商置地及建設銀行之衍生工具。