點解史高斯喺上周六曼聯傳奇隊作客打和拜仁慕尼黑明星隊3:3嘅表演賽上，要着件冇名冇冧巴嘅波衫踢下半場呢？之唔係佢喺半場時，將波衫送咗畀佢嘅星級粉絲舒韋恩史迪加囉。
賽前歡迎世盃功臣
拜仁喺禮拜三會作客多蒙特進行德國超級盃，在此之前喺上周六，先喺主場安聯球場由佢哋嘅明星隊同曼聯傳奇隊踢場表演賽，收入會捐畀安聯兒童基金。開波之前，佢哋舉行咗一課公開操練，同埋搞咗一個歡迎會，安聯全場65,500名球迷以熱烈掌聲歡迎幫德國捧走世盃嘅謝路美保定、馬里奧葛斯、紐亞、湯馬士梅拿、舒韋恩史迪加同拿姆返嚟慕尼黑。至於場慈善表演賽，拜仁同曼聯啲現役球員雖然冇份玩，但都星光熠熠，前者有雲邦美、畢列拿、巴布同艾巴等，後者則有朗尼莊臣、艾雲、史高斯，同埋「黑雙煞」約基及高爾。
高爾𡁻兩粒3:3和氣收場
話明係表演賽，梗係你一球、我一球。曼聯喺9分鐘由高爾先開紀錄，拜仁1分鐘後由沙治奧追平，再喺21分鐘靠艾巴入波反超前2:1，但5分鐘後曼聯由史高斯追成2:2。不過，薛基拿喺38分鐘建功，令拜仁半場領先3:2。高爾喺83分鐘攻入個人第2球，最終令曼聯逼和拜仁3:3，雙方和氣收場。
值得一提嘅係，打足全場嘅史高斯下半場居然着件冇名冇冧巴嘅波衫比賽。賽後佢接受訪問表示：「我將原本件衫送咗畀舒韋恩史迪加。半場佢問我攞衫，於是我除咗畀佢。佢都送番件波衫畀我。我覺得好開心，佢係個好出眾嘅球員，幫拜仁贏咗好多錦標，而且仲啱啱贏埋世界盃。我同佢傾咗幾分鐘，能夠同咁偉大嘅球員交換波衫，實在係一件妙事。」講到自己踢足90分鐘，佢話：「我成40歲，打足全場唔易頂，不過呢場波有6個入球，希望現場觀眾收貨啦！」