四大天王之中，只有48歲郭富城未結過婚，而黎明結完婚仲離埋㖭！所以城城真係特別惹桃花，近年嘅佢經常同啲𡃁模扯埋一齊，噚日就有周刊話佢出席沈嘉偉飯局，帶醉揀𡃁模。但查實只係女子組合Super Girls成員吳嘉熙（Cheronna）喺Instagram貼咗一張合照！
出席試食冇飲酒
噚日城城經理人小美睇完周刊嘅報道，都有同城城了解過，佢話：「對於一啲看圖作故事嘅封面，其實冇乜好回應。嗰日城城純粹去撐嘉偉嘅餐廳試食會，留咗一陣就走，亦冇飲過酒。呢啲場合，有人要求影相，同人合照係禮貌，唔值得大驚小怪。每個人都會參與社交活動，撐朋友亦好合理，明眼人好清楚係乜嘢一回事。」
聽講呢位Cheronna係佢忠實粉絲，所以嗰日喺沈嘉偉試食會見到城城時，就捉住影佢合照，然後就好開心咁將張照片放上網，睇嚟城城想杜絕呢啲假桃花，最佳方法都係正正經經搵番個固定女朋友，咁就可以少惹緋聞啦！
撰文：馮仁昭
