同熱火完咗合約之後去向未定嘅3分王阿倫，近排頻頻出現喺高球場，好似已經叠埋心水過退休人士生活咁，早兩日仲同總統奧巴馬打咗場友誼波㖭（圖）。不過據阿倫嘅朋友爆料，佢已經講咗新球季會繼續打波，仲未退休住；不過就會等到9月先正式公佈呢個決定。騎士10月11號會喺巴西里約同熱火打場季前熱身賽，唔知到時大家會唔會見證阿倫同勒邦占士齊齊倒戈呢？